Ég hef stundum verið spurður um það hvernig eigi að steikja hitt eða þetta ketið og vefst jafnan tunga um höfuð og háls. Aðrir menn eru mér miklu meiri sérfræðingar í þessu. Sumir gera þetta eftir tilfinningunni einni og prófa hversu vel gangi, það geri ég. Aðrir nota kjöthitamæli, það kann ég ekki nógu vel. En best þykir mér að leita til þess manns sem mest veit um mat hér á norðurslóðum. Hann heitir Hermann Huijbens og er hvort tveggja matreiðslumeistari og kjötvinnslumeistari en er hins vegar á kafi í heilsusamlegu fæði, á og rekur Heilsuhúsið á Glerártorgi á Akureyri.
Ef steikja á nautalund segir Hermann að best sé að krydda vöðvann og snöggsteikja hann á pönnu, brjóta síðan upp á lundina í grennri endann og binda steikina upp þannig að vöðvinn sé jafnsver. Steikja þetta svo í ofni sem hitaður hefur verið í 200°C í 15-18 mínútur til að fá lundina mjúka en rauða í kjarnann.
Roast beef vill Hermann steikja svona: Maður brúnar vöðvann fyrst og kryddar, stingur honum svo í 200°C heitan ofn og steikir hann sem svarar til 35-45 mínútur á hvert kíló (svo þarf að reikna út frá því) eftir því hversu rautt ketið á að vera.
Efni
Brokkolķ
16.11.2006 00:09 - 1975 lestrar - Orš ķ belg (1)Nú man ég ekki hvað brokkolí heitir á íslensku, en ég tók einhvern tíma upp á því, eftir að brokkolí hafði skemmst í ísskápnum hjá mér, linast og farið svo að gulna og mygla, að taka brokkolígreinina, skera aðeins neðan af stönglinum til að opna sárið og stinga í vatnsglas og setti það bara út í eldhúsglugga, eins og þetta væri afskorið blóm. Viti menn, það fór að draga í sig vatn, varð svona stinnt og fallegt og ógurlega bragðgott. Mér finnst nefnilega sælgæti að brjóta eina og eina smágrein af brokkolíi og bryðja hrátt.
Ég gæti trúað að maður gæti geymt fleira grænmeti í vatni, í kæli eða utan hans. Gaman væri að heyra hvað aðrir segja um það.
« fyrri sķša | nęsta sķša »
